व्यापारिक महत्त्व बोकेको नेपाल र चिन जोड्ने तिंकर नाका साउन १ गतेबाट खुला।

दार्चुला। नेपाल–चीन जोड्ने सीमानाका तिंकर साउन १ गतेबाट खुला हुने भएको छ । चिनियाँ पक्षले व्याँस गाउँपालिका–१ छाङ्गरु र तिंकरका व्यापारीहरुलाई आमन्त्रण गरेको हो ।
‘अहिले अनौपचारिक रुपमा नाका सञ्चालन भएको छ,’ स्थानीय व्यापारी योगेश बोहराले भने, ‘औपचारिक रुपमा विस्तारै खुल्ला हुने छ ।’ छाङ्गरु तिंकरका व्यापारीहरुले साउन १ गतेबाट ताक्लाकोट जाने तयारी थालेका छन् ।
चिनियाँ पक्षले जिल्ला प्रशासन कार्यालयलाई ताक्लाकोट जान पास बनाएका व्यापारीहरुको नामावली माग गरेको हो । ताक्लाकोट नाका औपचारिक रुपमा खुलेको बारे जानकारी आएको छैन्, दार्चुलाका प्रमुख जिल्ला अधिकारी यज्ञराज जोशीले भने । तर ताक्लाकोटमा रहेका व्यापारीमार्फत अनौपचारिक रुपमा आउन खबर आएको छ । हामीले जिल्ला प्रशासन कार्यालयमार्फत पठाएका १८७ जनाको सूची पठाइदिएका छौ ।
नाका सञ्चालनको औपचारिक जानकारी न आए पनि स्थानीयले ताक्लाकोट जान तयारी थालेको बोहराले बताए । उनले भने, छाङ्गरु र तिंकरको बीच भागमा पर्ने राकाङ क्षेत्रमा बाटो अवरुद्ध भएको थियो । स्थानीयले सोमबार श्रमदानमार्फत बाटो मर्मत गरेको बोहराले बताए । बाटो सुधार गरिएको छ ।
कोभिड महामारीका कारण २०७६ सालदेखि बन्द भएको तिंकर नाका खुलेपछि व्यापारी भने खुसी भएका छन् ।